Romanos II.
Romanos II. | |
---|---|
Kaiser vom Byzantinische Riich | |
![]() | |
Regierigsziit | Novämber 959 – 15. Merz 963 |
Chrönig | 6. April 945 as Mitkaiser |
Uf d Wält cho | öbbe 938 |
Gstorbe | 15. Merz 963 (im Alter vo öbbe 25) |
Vorgänger | Konstantin VII. |
Nochfolger | Nikephoros II. |
Verhürotet mit | Eudokia vo Italie Theophanu |
![](http://178.128.105.246/content-http-upload.wikimedia.org/wikipedia/commons/thumb/7/79/Death_of_romanus_ii.jpg/220px-Death_of_romanus_ii.jpg)
Dr Romanos II. (middelgriech. Ρωμανὸς B', * 938; † 15. Merz 963) isch dr Soon vom Kaiser Konstantin VII. und dr Helene Lakapene und dr byzantinisch Kaiser vo 959 bis 963 gsi.
Lääbe
[ändere | Quälltäxt bearbeite]Dr Romanos isch 959 im Alter vo 21 sr Noochfolger vo sim Vater Konstantin VII. as byzantinische Kaiser worde. Er isch scho 944 mit dr Bertha, dr Dochder vom Köönig vo Italie Hugo vo Arles verhürootet worde, und sit 945 isch er Mitkaiser gsi. Noch em Dood vo dr Bertha, wo sich z Byzanz Eudokia gnennt het, het dr Romanos 956 d Anastaso, wo us seer äifachen Verheltniss gstammt het, ghürootet. As Kaiserin isch iire Naame Theophanu gsi.
Es het früener emol d These gee, ass die byzantinischi Brinzässin Theophanu, wo dr Otto II. ghürootet het, d Dochder vom Romanos gsi sig. Das glaubt mä hüte nüm.
Dr Romanos sig e gnusssüchtige Herrscher gsi, wo sich kuum um d Regierig kümmeret häig, aber bi dr Uswaal vo sine Berooter e glückligi Hand gha het, vor allem mit em Joseph Bringas, wo faktisch d Staatsgschäft gläitet het. S bedütendste Eräignisin sinere Regierigszit isch gsi, wo dr erfolgriichi General Nikephoros Phokas, wo spööter im Romanos si Noochfolger as Kaiser worden isch, Kreta 960/61 zruggerooberet het. Dr Nikephoros het au erfolgriichi Fäldzüüg z Syrie gfüert.
Dr Romanos isch 963 gstorbe. D Umständ vo sim Dood si unklaar, es isch nit sicher, ass er vergifdet worden isch wie d Lüt behauptet häi.
D Theophanu isch Regäntin für iiri zwäi Buebe worde und zum deene iiri Droonaasprüch z schütze, het si dr General Nikephoros Phokas ghürootet und en andere General, dr Johannes Tzimiskes as Liebhaaber gnoo. Si het zerst dr Nikephoros uf e Droon erhoobe und denn dr Johannes, wo dä dr Nikephoros umbrocht het. Wo dr Johannes Tzimiskes im Chrieg umchoo isch, isch iire elteri Bueb, dr Basileios, Kaiser worde.
Die wichdigsti Kwelle über em Romanos sini Regierigsziit si d Historie vom Leon Diakonos. Au d Kaisergschicht vom Johannes Skylitzes het Bedütig.
Liddratuur
[ändere | Quälltäxt bearbeite]- Ralph-Johannes Lilie: Byzanz – Das zweite Rom. Berlin 2003.
- Mark Whittow: The Making of Byzantium, 600–1025. Berkeley 1996.
Vorgänger Konstantin VII. |
Kaiser vo Byzanz 959–963 |
Nochfolger Nikephoros II. |
![]() |
Dä Artikel basiert uff ere fräie Übersetzig vum Artikel „Romanos_II.“ vu de dütsche Wikipedia. E Liste vu de Autore un Versione isch do z finde. |